Schools

Schools

६७२ ‌‌शिक्षकांच्या जागा रिक्त

PUBLISH DATE 4th November 2017

कोल्हापूर : सरकारने बदलीसंबंधी घेतलेले नवीन निर्णय आणि त्याला शिक्षक संघटनांच्या न्यायालयीन विरोधामुळे यंदा निम्मे शैक्षणिक वर्ष संपले तरी जिल्ह्यात ६७२ प्राथमिक ‌शिक्षकांच्या जागा रिक्त आहेत. त्यातील सर्वाधिक शाळा शाहूवाडी, राधानगरी, भुदरगड या डोंगराळ तालुक्यांतील आहेत. परिणामी संबंधित शाळांतील ‌विद्यार्थ्यांचे शैक्षणिक नुकसान होत आहे. सर्वच‌ शिक्षकांच्या सोयीच्या शाळांत जाण्यासाठी चढाओढीने गैरसोयीच्या, डोंगराळ तालुक्यातील गावातील शाळांतील विद्यार्थी शिक्षकांपासून वंचित राहिले.

जिल्ह्यात २००२ प्राथमिक ‌शाळा आहेत. इंग्रजी माध्यमाच्या शाळा व्यवस्थापकांकडून मनमानी फी आकारणीमुळे जिल्हा परिषदेच्या शाळांची पटसंख्या दोन वर्षांपासून वाढली आहे. दरम्यान, प्राथमिक शिक्षण प्रशासन सर्व शाळांत दर्जेदार सेवा, सुविधा, शिक्षक देण्यात अपयशी ठरते आहे. त्याचा सर्वाधिक फटका सामान्य, गरीब विद्यार्थ्यांना बसत आहे. राजकीय हस्तक्षेप कमी करण्यासाठी ऑनलाइन शिक्षक बदलीची प्रक्रिया राबवली जात आहे. याबरोबरच सरकारने वर्षानुवर्षे सोयीच्या ठिकाणी नोकरी केलेल्या शिक्षकांची उचलबांगडी व्हावी व डोंगराळ शाळांत नोकरी केलेल्या शिक्षकांची सोयीच्या शाळांत बदली होण्यासाठी सुगम, दुर्गम बदलीचे नवे धोरण याचवर्षी आणले. मात्र, त्याला सोयीच्या ठिकाणी नोकरीस असलेल्या शिक्षकांच्या संघटनेने जोरदार विरोध केला.

शिक्षकांनी न्यायालयात धाव घेतल्याने बदली प्र‌क्रियेमध्ये व्यत्यय आला. अजूनही असाच घोळ सुरू आहे. त्यामुळे प्रशासनास सर्व पात्र ‌शिक्षकांच्या जिल्ह्यांतर्गत बदल्या करता आल्या नाहीत. बाहेरच्या जिल्ह्यांतून कोल्हापूर जिल्ह्यात येण्यास पात्र असलेले सर्व शिक्षकही आले नाहीत. त्यामुळे रिक्त ‌शिक्षकांच्या जागा भरता आल्या नाहीत. सुरुवातीच्या टप्प्यात १११ शिक्षक बाहेरून आले. त्यांच्या पदस्थापनेवेळी विद्यार्थ्यांच्या सोयीपेक्षा मतांसाठी शिक्षकांची गैरसोय होणार नाही याकडे पदाधिकाऱ्यांनी विशेष लक्ष दिले. त्यासाठी अधिकारी पदाधिकाऱ्यांच्या दबावाला बळी पडले. आता शाळा सुरू होऊन सहा महिने झाले तरी विद्यार्थ्यांना शिक्षक मिळत नाहीत, तसेच प्रशासन, पदाधिकारी याबाबत गंभीर दिसत नाही. रिक्त शिक्षकप्रश्नी जिल्ह्याचे पालकमंत्री चंद्रकांत पाटील, आमदार, खासदारांनीही फारसे लक्ष दिलेले दिसत नाही. त्यामुळे रिक्त जागी शिक्षक मिळण्याची शक्यता धुसर बनली आहे.

दोन हजार शाळा सहाशेवर रिक्त

एकूण शाळा – २००२

कार्यरत शिक्षक - ८३८४

रिक्त जागा – ६७२

संवर्गनिहाय रिक्त जागा

विषय शिक्षक : १४४,

केंद्रप्रमुख : ८७,

अध्यापक : ३६७,

मुख्याध्यापक : ७४.


प्रस्ताव नाकारला

विद्यार्थ्यांचे शैक्षणिक नुकसान होऊ नये, यासाठी शिक्षकांच्या रिक्त जागी संबंधित गावातील बेरोजगार डीएड्, बीएड् उमेदवारांना अध्यापनाची संधी देऊन त्यांना मानधन देण्याचा प्रस्ताव जिल्हा परिषदेने ‌सरकारकडे पाठवला होता. मात्र, ते उमेदवार कायमस्वरुपी नियुक्तीचा दावा करतील, या भीतीपोटी सरकारने तो प्रस्ताव नाकारला. परिणामी रिक्त जागेचा प्रश्न कायम आहे.

परजिल्ह्यातून बदलीने कोल्हापुरात १७० शिक्षक‌ येणे अपेक्षित आहे. ते आल्यानंतर रिक्त जागेवर त्यांच्या नियुक्तीचे नियोजन केले आहे. सेवानिवृत्त शिक्षकांनाही रिक्त ‌ठिकाणी स्वयंसेवी तत्त्वावर अध्यापनासाठी घेण्याची सूचना दिली आहे. विविध कारणांमुळे निलंबित शिक्षकांना सरकारच्या‌ नियमानुसार पुन्हा घेताना रिक्त ठिकाणीच पुनर्नियुक्तीचा आदेश दिला जात आहे. शिक्षकांविना विद्यार्थ्यांचे नुकसान होऊ नये, याकडे प्रशासन लक्ष देत आहे.
डॉ. कुणाल खेमनार,सीईओ

अधिक महिती : महाराष्ट्र शिक्षक अभियोग्यता आणि बुद्धिमत्ता चाचणी

Marathi News from Maharashtra Times 

--------------------------------------------------------------------------------------------------------------------------------------------------------

GET Free Educational Updates (Entrance Exam, Admissions, Jobs & many more...) Alerts on WhatsApp, Send message on 7720025900

--------------------------------------------------------------------------------------------------------------------------------------------------------

'विद्यार्थी मित्र' जॉईन करा आणि मिळवा न्यूज, जॉब, माहिती अगदी विनामूल्य ते ही आपल्या व्हॉटस्अॅपवर. <नाव> <शहराचे नाव> <नोकरी>७७२०० २५९०० मेसेज व्हॉटस्अॅपवर पाठवा

https://goo.gl/YPjt94

--------------------------------------------------------------------------------------------------------------------------------------------------------