CBSE

CBSE

शहिदांची गाथा शालेय अभ्यासात

PUBLISH DATE 3rd November 2017

येत्या वर्षापासून ‘सीबीएसई’च्या पुस्तकांत समावेश होणार

शूर सैनिकांनी सीमेवर केलेल्या पराक्रमांची गाथा विद्यार्थ्यांपर्यंत ‘सीबीएसई’च्या क्रमिक पुस्तकांमधून पोहोचवली जाणार आहे. तसेच, विद्यापीठ आणि कॉलेजांमध्येही सीमेवर हौतात्म्य पत्कारलेल्या सैनिकांच्या प्रतिमांचे एक विशेष दालन उभारण्यात येणार आहे. त्यासाठी लष्कराने मनुष्यबळ विकास मंत्रालयाने प्रस्ताव पाठविला आहे. त्यावर लवकरच निर्णय होऊन येत्या शैक्षणिक वर्षापासून हा निर्णय अंमलात येणार आहे.
‌बी. एन. श्रीवास्तव फाउंडेशनतर्फे गुरुवारी आयोजित कार्यक्रमात लष्करप्रमुख जनरल बिपीन रावत यांनी ही माहिती दिली. केंद्रीय मनुष्यबळ विकास मंत्री प्रकाश जावडेकर यांनी हा निर्णय येत्या शैक्षणिक वर्षांपासून लागू करण्याचे आश्वासन दिले आहे. रावत यांच्या हस्ते सैनिकांना शुभेच्छापत्रे पाठविणाऱ्या केंद्रीय विद्यालयांसोबतच इतर शाळांना सन्मानचिन्ह देऊन गौरविण्यात आले.
लष्कराच्या दक्षिण मुख्यालयाचे प्रमुख लेफ्टनंट जनरल मनोज पांडे, त्यांच्या पत्नी अर्चना पांडे, रावत यांच्या पत्नी मधुलिका रावत, फाउंडेशनचे अध्यक्ष लेफ्टनंट जनरल गौतम बॅनर्जी (निवृत्त), समन्वयक विजयकुमार श्रीवास्तव आदी या वेळी उपस्थित होते.

रावत म्हणाले, ‘देशासाठी सीमेवर लढणाऱ्या सैनिकांच्या शौर्य, पराक्रम आणि त्यागाची माहिती विद्यार्थ्यांपर्यंत पोहोचविण्याचा लष्कराचा उद्देश आहे. ही माहिती विद्यार्थ्यांपर्यंत आता पुस्तकांच्या माध्यमातून पोहोचविण्यात येईल. गेल्या महिन्यातच सीमेवर पराक्रम करणाऱ्या आणि शौर्य पदक, पुरस्कार मिळालेल्या सैनिकांची माहिती असलेले पुस्तक प्रकाशित करण्यात आले आहे. यापुढे शहीद सैनिकांची माहिती विद्यार्थ्यांना शालेय अभ्यासक्रमात मिळण्यासाठी केंद्रीय मनुष्यबळ विकास मंत्रालयाशी चर्चाही केली आहे. त्यानुसार संबंधित पुस्तकाचा सीबीएसईच्या पुस्तकात समावेश करण्याची मागणी मंत्रालयाला केली आहे. जावडेकर यांनी याबाबत येत्या शैक्षणिक वर्षापासून सकारात्मक भूमिका घेण्याचे आश्वासन दिले आहे.’ शहिदांच्या शौर्याची व त्यांना मिळालेल्या पुरस्कारांची माहिती विद्यार्थ्यांना देण्यासाठी येत्या शैक्षणिक वर्षापासून कॉलेज आणि विद्यापीठांमध्ये विशेष दालन तयार करण्यात येणार आहे. या दालनामध्ये शहीदांच्या प्रतिमा, माहिती आणि त्यांना मिळालेले पदक व पुरस्काराची माहिती राहील. विद्यापीठ व कॉलेज अशा एकूण दोनशे संस्थांमध्ये असे दालन उभारण्यात आले आहे.
सैनिकांना सात हजार शुभेच्छापत्रे पाठविणाऱ्या डीएव्ही शाळेला फिल्ड मार्शल सॅम मानेकशॉ फिरता चषक प्रदान करण्यात आला. जयश्री व्यंकटरामन यांनी तो स्वीकारला. लेफ्टनंट कर्नल आर्देसर चषक विवा इन्स्टिट्यूट ऑफ अप्लाइड आर्टसला देण्यात आला.

धायल त्रयींचा सत्कार

लेफ्टनंट कर्नल विक्रम धायल आणि ईश्वरी धायल या दाम्पत्याच्या तिन्ही पाल्यांनी आंतरराष्ट्रीय धर्नुविद्या स्पर्धेत विजेतेपद संपादन केले आहे. त्यामुळे रावत यांच्या हस्ते खुशबू धायल, दिव्या धायल आणि दिग्विजय धायल यांचा विशेष सत्कार करण्यात आला. ऑलिम्पिकमध्ये सुवर्ण पदक पटकाविण्यासाठी रावत यांनी त्यांना शुभेच्छाही दिल्या.

 

--------------------------------------------------------------------------------------------------------------------------------------------------------

GET Free Educational Updates (Entrance Exam, Admissions, Jobs & many more...) Alerts on WhatsApp, Send message on 7720025900

--------------------------------------------------------------------------------------------------------------------------------------------------------

'विद्यार्थी मित्र' जॉईन करा आणि मिळवा न्यूज, जॉब, माहिती अगदी विनामूल्य ते ही आपल्या व्हॉटस्अॅपवर. <नाव> <शहराचे नाव> <नोकरी>७७२०० २५९०० मेसेज व्हॉटस्अॅपवर पाठवा

https://goo.gl/YPjt94

--------------------------------------------------------------------------------------------------------------------------------------------------------