Teacher Eligibility Test

Teacher Eligibility Test

राज्यात उद्यापासून शिक्षकांची परीक्षा

PUBLISH DATE 11th December 2017

पुणेः

राज्यातील प्राथमिक, माध्यमिक, उच्च माध्यमिक शाळांमध्ये शिक्षक भरती करण्यासाठी घेण्यात येणारी अभियोग्यता आणि बुद्धीमापन चाचणी आज मंगळवार १२ रोजी सुरू होणार आहे. ही परीक्षा येत्या २१ डिसेंबरपर्यंत राज्यातील ६७ ठिकाणी तीन बॅचमध्ये चालणार असून १ लाख ९७ हजार ५२० परीक्षार्थी मराठी, हिंदी, उर्दू या तीन भाषांमध्ये परीक्षा देणार असल्याची माहिती राज्य परीक्षा परीषदेचे अध्यक्ष दत्तात्रय जगताप यांनी दिली आहे.

साधारण २०१२ मध्ये बंद झालेल्या शिक्षक भरतीनंतरही अनेक शाळांनी वैयक्तिक मान्यतांच्या आणि ना-हरकत प्रमाणपत्रांच्या आधारे शिक्षक भरती केली. या भरतीमध्ये मोठ्या प्रमाणात अनियमियतता देखील झाली. त्यामुळेच राज्यातील स्थानिक स्वराज्य संस्थांसह खासगी व्यवस्थापनाच्या अनुदानित, अंशत: अनुदानित आणि अनुदानास पात्र असलेल्या प्राथमिक, माध्यमिक आणि उच्च माध्यमिक शाळांमधील शिक्षण सेवकांच्या रिक्त पदांवर भरती करताना सर्व उमेदवारांना निवडीची समान संधी मिळण्यासाठी शिक्षण सेवकांची भरती अभियोग्यता आणि बुद्धिमत्ता चाचणीच्या आधारे करण्याचा निर्णय शासनाने घेतला होता. त्यानुसार ही चाचणी घेण्यासाठी एका एजन्सीची नियुक्ती करण्यात आली आहे. या एजन्सीच्या सावळ्या गोंधळामुळे राज्यात १ लाख ९७ हजार ५२० विद्यार्थ्यांसाठी केवळ ६७ केंद्रे निवडण्यात आली आहेत. त्यामुळे अनेक विद्यार्थ्यांना आपल्या घरापासून किमान २०० ते ३०० किलोमीटर दूर अंतरावरील केंद्र परीक्षेसाठी मिळाले आहे. परीक्षेसाठी तीन बॅचचे नियोजन करण्यात आले असून सकाळी ९ ते ११, दुपारी १२.३० ते २.३० आणि संध्याकाळी ४ ते ६ या वेळेत ऑनलाइन परीक्षा घेतली जाणार आहे. सकाळी ९ ते ११ या बॅचच्या परीक्षेसाठी केंद्रावर सकाळी ७.३० वाजता पोहचावे लागणार आहे. तर, प्रत्येक बॅचची परीक्षा सुरू होण्यापूर्वी किमान दिड तास अगोदर विद्यार्थ्यांना केंद्रावर हजर रहावे लागणार आहे.

इयत्ता पहिली ते आठवीचा शिक्षक होण्यासाठी २५ हजार ९९७ विद्यार्थ्यांनी अर्ज केला आहे. तर, इयत्ता नववी ते बारावीसाठी १ लाख ५६ हजार ४७२ विद्यार्थ्यांनी अर्ज केले आहेत. तर, इयत्ता पहिली ते थेट इयत्ता बारावी पर्यंत शिकवण्यासाठी तब्बल १५ हजार ५१ विद्यार्थ्यांनी अर्ज केले आहेत. पुणे शहरात एकूण चार केंद्र देण्यात आली असून शहरातील १६ हजार ७७५ विद्यार्थ्यांनी अर्ज भरले आहेत. तरी देखील त्यांना शहरात केंद्र मिळाले नसून परीक्षेसाठी दुसर्‍या जिल्ह्यात जाण्याची वेळ आली आहे. विद्यार्थ्यांना काही तक्रार असेल तर १८००३०००१६५६ या हेल्पलाईन नंबरवर संपर्क करण्याचे आवाहन परीक्षा परिषदेमार्फत करण्यात आले आहे.

परीक्षार्थ्यांना परीक्षा केंद्रावर केवळ हॉलतिकीट आणि पेन घेवून जाता येणार आहे. तसेच, ओळखपत्र म्हणून आधारकार्ड, पॅनकार्ड, मतदार ओळखपत्र या कागदपत्रांपैकी कोणतेही एक ओरीजनल कागदपत्र घेवून जायचे आहे. केंद्रावर कोणतेही इलेक्ट्रॉनिक गॅझेट किंवा अन्य इलेक्ट्रॉनिक उपकरणे घेवून जाण्यास परवानगी नाही.

--------------------------------------------------------------------------------------------------------------------------------------------------------

GET Free Educational Updates (Entrance Exam, Admissions, Jobs & many more...) Alerts on WhatsApp, Send message on 7720025900

--------------------------------------------------------------------------------------------------------------------------------------------------------

'विद्यार्थी मित्र' जॉईन करा आणि मिळवा न्यूज, जॉब, माहिती अगदी विनामूल्य ते ही आपल्या व्हॉटस्अॅपवर. <नाव> <शहराचे नाव> <नोकरी>७७२०० २५९०० मेसेज व्हॉटस्अॅपवर पाठवा

https://goo.gl/YPjt94
--------------------------------------------------------------------------------------------------------------------------------------------------------