Jobs

Jobs

टायपिंगचा खडखडाट पुन्हा सुरू

PUBLISH DATE 18th November 2017

राज्य सरकारने सरकारी कार्यालयांमध्ये कम्प्युटरचा वापर वाढत असल्याचे सांगत मॅन्युअल टायपिंग कोर्स २०१३ सालामध्ये टप्प्याटप्प्याने बंद करण्याचे जाहीर केले. मात्र, विद्यार्थ्यांकडून मॅन्युअल टायपिंग कोर्सला असलेली मागणी, कमी शुल्क, अंध विद्यार्थ्यांची गरज आणि टायपिंग इन्स्टिट्यूट चालकांची मागणी अशा कारणांमुळे राज्य सरकारने या कोर्सला दोन वर्षांची मुदतवाढ दिली आहे. त्यामुळे राज्यात सुमारे साडेतीन हजार टायपिंग इन्स्टिट्यूटमध्ये मॅन्युअल टायपिंगची टकटक पुन्हा सुरू होणार आहे.
राज्य सरकारने हा कोर्स ३० नोव्हेंबर २०१९ पर्यत सुरू राहणार असल्याचा निर्णय गुरुवारी जाहीर केला. त्यानुसार इन्स्टिट्यूटचालकांनी कोर्स सुरू करायचे आहेत. तसेच, ३० नोव्हेंबर २०१९ नंतर कोर्स सुरू ठेवायचा की नाही, याबाबत तेव्हा आढावा घेऊन निर्णय घेण्यात येतील, असे निर्णयात सांगितले आहे. ग्रामीण भागातील तसेच आर्थिक दुर्बल घटकांमधील विद्यार्थी, अंध विद्यार्थी, इन्स्टिट्यूट चालक यांच्यासाठी कम्प्यूटर टायपिंग कोर्ससोबत मॅन्युअल टायपिंग कोर्स सुरू ठेवण्यात येण्यासाठी ‘मटा’ने वेळोवेळी बातम्यांद्वारे पाठपुरावा केला होता. तसेच, सध्या ग्रामीण भागात लोडशेडिंगमुळे कम्प्युटर टायपिंग कोर्स चालविण्यात अडचणी येत आहेत. अशातच कम्प्युटर कोर्सचे शुल्क मॅन्युअल टायपिंगच्या तुलनेत दुप्पट असल्याने विद्यार्थ्यांना अडचणी येत आहेत.
महाराष्ट्र राज्य परीक्षा परिषदेकडून गेल्या अनेक वर्षांपासून मॅन्युअल टायपिंग कोर्सची परीक्षा घेण्यात येते. शेवटची परीक्षा ऑगस्टमध्ये राज्यात पार पडली. या परीक्षेसाठी राज्यभरातून सुमारे २ लाख विद्यार्थ्यांनी अर्ज केले होते. दोन लाखांहून अधिक विद्यार्थ्यांनी अर्ज करूनही सरकार टंकलेखनाचा अभ्यासक्रम बंद करीत आहे. त्यामुळे विद्यार्थी आणि टायपिंग इन्स्टिट्यूट चालकांमध्ये नाराजीचे वातावरण होते. हा कोर्स गोरगरीब आणि होतकरू तरुणांसाठी संजीवनी ठरला आहे. दहावी, बारावीनंतर अनेक विद्यार्थ्यांना हलाखीच्या परिस्थितीमुळे उच्च शिक्षण घेता येत नाही. अशा वेळी किमान शिक्षण असतानाही व्यवसायाची आणि नोकरीची संधी प्राप्त करून देणारा अभ्यासक्रम म्हणून याकडे पाहिले जाते. मात्र, कम्प्युटरचे युग आल्याने टंकलेखन अभ्यासक्रमाची अवस्था वाईट झाली. दरम्यान, हा कोर्स पुन्हा सुरू करावा यासाठी इन्स्टिट्यूट चालकांनी न्यायालयात याचिका दाखल केली होती. तसेच, इन्स्टिट्यूट चालकांनी कोर्स सुरू करण्याबाबत शिक्षण विभाग, शिक्षण मंत्री विनोद तावडे, परीक्षा परिषदेकडे मागणी केली होती. या सर्वांचा विचार करून राज्य सरकारने कोर्स ३० नोव्हेंबर २०१९ पर्यत सुरू ठेवण्याचा निर्णय घेतल्याने इन्स्टिट्यूट चालकांमध्ये समाधानाचे वातावरण आहे.
महाराष्ट्र राज्य परीक्षा परिषदेने ऑगस्ट महिन्यात घेतलेल्या मॅन्युअल टायपिंग कोर्सच्या परीक्षेत अनुत्तीर्ण झालेल्यांना कम्प्युटरवर परीक्षा देण्याचे जाहीर केले होते. मात्र, आता सरकारनेच मॅन्युअल टायपिंग कोर्सला दोन वर्षांसाठी मुदतवाढ दिल्याने अनुत्तीर्णांची परीक्षा मॅन्युअल टायपिंग यंत्रावर घेण्यात यावी. तसेच, या परीक्षेबाबत त्वरित कारवाई करून अनुत्तीर्ण विद्यार्थ्यांना दिलासा द्यावा, अशी मागणी राज्यातील इन्स्टिट्यूट चालकांकडून होत आहे. याबाबतच्या मागणीचे निवेदन परीक्षा परिषदेला देण्यात येणार असल्याचे ‘हर्डीकर्स न्यू शॉर्टहँड अॅंड टाइपरायटिंग इन्स्टिट्यूट’चे प्रसाद हर्डीकर यांनी सांगितले.

--------------------------------------------------------------------------------------------------------------------------------------------------------

GET Free Educational Updates (Entrance Exam, Admissions, Jobs & many more...) Alerts on WhatsApp, Send message on 7720025900

--------------------------------------------------------------------------------------------------------------------------------------------------------

'विद्यार्थी मित्र' जॉईन करा आणि मिळवा न्यूज, जॉब, माहिती अगदी विनामूल्य ते ही आपल्या व्हॉटस्अॅपवर. <नाव> <शहराचे नाव> <नोकरी>७७२०० २५९०० मेसेज व्हॉटस्अॅपवर पाठवा

https://goo.gl/YPjt94
--------------------------------------------------------------------------------------------------------------------------------------------------------