11th Admissions 2019-20

11th Admissions 2019-20

अकरावीसाठी अॅडमिशन घेताना...

PUBLISH DATE 28th June 2018

दहावीच्या परीक्षेनंतर विद्यार्थी-पालकांना कुठली चिंता सतावत असेल तर ती म्हणजे अकरावी प्रवेश प्रक्रियेची! कुठला अभ्यासक्रम चांगला? कुठलं कॉलेज निवडायचं? फॉर्म नीट भरला जाईल ना? 

एकदा आपला अर्ज नीट भरला गेला किंवा पहिल्या गुणवत्ता यादीत नाव झळकलं की अनेक विद्यार्थी-पालकांच्या मनावरील अर्धा ताण दूर होतो. पण ही प्रक्रिया घडताना आधार लागतो तो तज्ज्ञांच्या मार्गदर्शनाचा. नेमकं तेच देण्याचा प्रयत्न मटाच्या प्लॅनेट कॅम्पसनं केला. या सेमिनारला विद्यार्थी-पालकांनी चांगलीच गर्दी केली होती.

'एडिट'चा पर्याय

दहावीच्या परीक्षेसाठी नोंदणी करताना भरलेली माहिती आपोआप तुमच्या प्रवेशप्रक्रिया फॉर्मवर येईल. या माहितीमध्ये काही चुका अथवा बदल असल्यास स्टुडंट प्रोफाइलमध्ये 'एडिट माय प्रोफाइल' हा पर्याय उपलब्ध करून देण्यात आला आहे. पण हा बदल प्रमाणित करण्याचे पूर्ण अधिकार हे शाळेकडे असतील. विद्यार्थी यामध्ये कुठलेही बदल करू शकणार नाही. अनवधानाने काही बदल झाल्यास तो बदल शाळेनं प्रमाणित केल्याशिवाय ग्राह्य धरला जाणार नाही.

हे बंधनकारकच!

० विद्यार्थ्यांनी कॉलेजसंबंधी पसंतीक्रम भरताना कुठल्याही एका कॉलेजचा अट्टाहास न करता आपल्याला मिळालेले गुण, आपल्या घरापासून लांब किंवा जवळ, प्रवासासाठी सहज अशा काही गोष्टी लक्षात घ्यायच्या आहेत. दुसरी गोष्ट म्हणजे, पसंतीक्रमानुसार पहिल्या कॉलेजसाठी निवड झाल्यास तिथे प्रवेश घेणं बंधनकारक राहील. २ ते १० नंबरवरील कॉलेज लागल्यास, बेटरमेंटची एक संधी उपलब्ध होईल. परंतु विद्यार्थ्यांनी शक्यतो पहिल्याच यादीत नाव आलेल्या कॉलेजमध्येच प्रवेश घेणं योग्य ठरेल. दुसऱ्या यादीत सर्वोत्तम कॉलेजमध्ये प्रवेशासाठी अधिक चुरस असण्याची शक्यता नाकारता येत नाही.

० यंदा महत्त्वाचा फायदा विद्यार्थ्यांना असेल तो म्हणजे दुसऱ्या गुणवत्ता यादीपूर्वी आपल्या पसंतीक्रमासोबत थेट शाखा बदलता येणार आहे. (पहिल्या यादीपूर्वी विज्ञान शाखा निवडली व पहिल्या गुणवत्ता यादीनंतर विचार बदलून वाणिज्य शाखेत प्रवेश घ्यायचा झाल्यास विद्यार्थ्यांना ते सहज शक्य होणार आहे)

० ऑफलाइन प्रवेश? नाहीच!

ऑफलाइन प्रवेश करून देतो असं सांगून कोणी पैशांची मागणी करत असेल, तर वेळीच सावध व्हा. राज्य मंडळाच्या अखत्यारित असलेल्या कुठल्याही कॉलेजमध्ये ऑफलाईन प्रवेश होत नाहीत. तसं झाल्यास त्वरित त्याची तक्रार करा. तात्काळ संबंधित व्यक्ती तसंच कॉलेजवर कारवाई केली जाईल. दुसरी महत्त्वाची गोष्ट म्हणजे, ही प्रवेशप्रक्रिया थेट बारावी परीक्षेशी निगडित असून परस्पर ऑफलाइन प्रवेश घेतल्यास बारावी ऑनलाइन प्रक्रियेत तुम्ही लिंक होणार नाही.

तुमच्यासाठी सज्ज

दहावीच्या प्रवेश प्रक्रियेबद्दल विद्यार्थ्यांना नेहमीच काही ना काही शंका असतात. यासाठी प्रत्येक शाळेनं विद्यार्थ्यांना योग्य मार्गदर्शन करायचं आहे. त्याचबरोबर राज्य शिक्षण मंडळाकडूनही ३४ मार्गदर्शन केंद्रं उपलब्ध करून देण्यात आली आहेत. विद्यार्थ्यांना काही अडचणी किंवा शंका असल्यास त्यांना या मार्गदर्शन केंद्राची मदत घेता येणार आहे. या सर्व मार्गदर्शन केंद्र व ठिकाणांची माहिती मंडळाच्या संकेतस्थळावर देण्यात आली आहे.

कॉलेज निवडताना...

विद्यार्थी-पालकांनी कॉलेज निवडताना ते अनुदानित वा विनाअनुदानित आहे का? हे पडताळून पाहावं. फॉर्म भरताना अनुदानित, विना-अनुदानित किंवा सेल्फ फायनान्स कॉलेजचे कोड वेगवेगळे दिलेले असतात, हे सर्वांनी गांभीर्यानं लक्षात घ्यायला हवं. त्यामुळे फॉर्म भरताना विद्यार्थी ज्या कॉलेज कोडचा उल्लेख करतील त्या कॉलेजचाच प्रवेशप्रक्रियेसाठी विचार केला जाईल.

पहिले १२ दिवस

निकाल जाहीर झाल्यानंतर पहिले बारा दिवस हे अल्पसंख्यांक, इन-हाऊस तसेच बायफोकलचे प्रवेशप्रक्रिया सुरू राहतील. त्यानंतर इतर नियमित शाखांची प्रवेशप्रक्रिया सुरू केली जाईल.

बेस्ट फाईव्ह कोणाला?

बेस्ट फाईव्ह ही सुविधा नव्याने अकरावीसाठी प्रवेश घेणाऱ्या (फ्रेशर्स) विद्यार्थ्यांसाठीच असणार आहे. रिपीटर किंवा मध्ये काही वर्षांचा गॅप घेऊन पुन्हा परीक्षा देणारे (प्रिव्हिअस) यांच्यासाठी ही सुविधा उपलब्ध नसेल. त्याचसोबत फॉर्म भरताना यूडीआयसी व इंडेक्स नंबर विद्यार्थ्यांकडे नसल्यास तात्काळ शाळेशी संपर्क साधून ते नंबर मिळवायचे आहेत.

बायफोकल

० यंदा बायफोकलची प्रवेशप्रक्रिया नियमित अभ्यासक्रमांप्रमाणे (पहिल्यांदा) ऑनलाइन होणार असून बायफोकल घेऊन फॉर्म भरणाऱ्या विद्यार्थ्यांना आपल्या पसंतीची २५ कॉलेज पसंतीक्रमानुसार टाकता येणार आहेत.

० ही यादी एकदा भरल्यानंतर त्यात पुन्हा बदल करता येणार नसल्याने पसंतीक्रम भरताना विद्यार्थ्यांनी फार काळजी घेणं आवश्यक आहे.

० पहिल्या गुणवत्ता यादीत पसंतीक्रमातील प्रथम क्रमांकाचं कॉलेज आल्यास तिथे प्रवेश घेणं बंधनकारक असेल.

० प्रथम क्रमांकाच्या कॉलेजमध्ये प्रवेश न घेतल्यास बायफोकलच्या पुढील गुणवत्ता यादीत तो विद्यार्थी बाद ठरवला जाईल. परंतु कला, वाणिज्य, विज्ञान शाखांच्या गुणवत्ता यादीत सदर विद्यार्थी पात्र ठरेल.

० बायफोकल घेतल्यानंतर विद्यार्थ्यांसाठी मेडिकल व पॅरामेडिकलचे क्षेत्रांचे दरवाजे बंद होतील.

० बायफोकलसाठी कला, क्रीडा असं कुठलेही आरक्षण नसणार असून ५२% जातनिहाय आरक्षण तसेच दहावीला टेक्निकल विषय असणाऱ्या विद्यार्थ्यांना २५% आरक्षण असणार आहे.

असा भराल फॉर्म

१. शाळा शिक्षण आणि क्रीडा विभागाच्या https://mumbai.11thadmission.net/index.html या संकेतस्थळाला भेट द्या.

२. या पेजच्या उजव्या बाजूला स्टुडंट लॉग-इन असा पर्याय असेल त्यावर क्लिक करा.

३. शाळेतून दिलेल्या माहिती पुस्तिकेतील लॉग-इन आयडी व पासवर्ड समोर असलेल्या रकान्यात भरा.

४. सुरक्षेच्या दृष्टीने नवीन पासवर्ड बनवा. शक्य असल्यास त्याची प्रिंट काढून ठेवा जेणेकरून पासवर्ड विसरल्यास अडचण होणार नाही.

५. आपल्यासमोर भाग १ व २ असे पर्याय उपलब्ध होतील त्यापैकी भाग-१ मध्ये स्वतःची संपूर्ण माहिती भरायची असून भाग-२ हा निकाल जाहीर झाल्यानंतर भरायचा आहे.

६. भाग-१ ची माहिती भरताना आपलं नाव, पत्ता, संपर्क क्रमांक (शक्य असल्यास ई-मेल आयडी) याची योग्य माहिती भरावी.

७. सदर फॉर्म पूर्ण भरून झाल्यावर फॉर्म सेव्ह करून ठेवावा.

८. फॉर्म सेव्ह झाल्यानंतर 'पेंडिंग स्टेटस' दाखवत असल्यास घाबरण्याची गरज नाही. आपण सादर केलेलं जातीचं प्रमाणपत्र, एक्स सर्व्हिसमेन प्रमाणपत्र याची शाळेकडून पडताळणी होताच ते शाळेकडूनच सबमिट केलं जाईल.

० कला, विज्ञान, वाणिज्य तसेच एमसीव्हीसी अशा नियमित शाखांचे प्रवेश ऑनलाइन असतील तर होम सायन्स व नाइट कॉलेजांचे प्रवेश हे ऑफलाइन पद्धतीने होतील.

० प्रत्येक कॉलेजमध्ये २०% इन-हाऊस कोटा तर ५% व्यवस्थापन कोटा म्हणून जागा राखीव असतात.

० राज्य शिक्षण मंडळाशी संलग्नित कुठल्याही कॉलेजमध्ये प्रवेश घेताना ते ऑनलाइन असणं गरजेचं असणार आहे. ऑफलाइन पद्धतीनं घेतलेले प्रवेश ग्राह्य धरले जाणार नाहीत. किंबहुना प्रथम वर्ष पदवी अभ्यासक्रमासाठी प्रवेश घेताना ऑफलाइन पद्धत अडचणीची ठरू शकते.

० प्रवेश प्रक्रियांसाठी दिली जाणारी माहितीपुस्तिका काळजीपूर्वक वाचणं गरजेचं आहे. प्रवेशासंबंधी सर्व माहिती त्यामध्येच दिलेली असते.

० कॉलेज कोड संकेतस्थळावर उपलब्ध आहेत. त्यामुळे आताच आपल्याला कुठलं कॉलेज हवं आहे ते शोधून त्या कोडसहित तयारीत राहावं. जेणेकरून प्रवेशप्रक्रियेच्या वेळी धावपळ होणार नाही.

प्रवेशअर्ज भरताना कुठलीही चूक होणार नाही याकडे गांभीर्याने लक्ष द्या. कारण शिक्षण मंडळाकडून प्रवेशप्रक्रियेचं नीट नियोजन केलेलं असतं. परंतु काहीवेळा विद्यार्थी व पालक त्यांची चूक असूनही शिक्षण मंडळाकडे तक्रारी घेऊन येतात. त्याचसोबत विद्यार्थ्यांना कुठलीही अडचण असल्यास त्यांना शिक्षण मंडळाकडून पूर्ण सहकार्य मिळेल.

- राजेंद्र अहिरे, उपसंचालक, महाराष्ट्र शिक्षण मंडळ

अकरावी प्रवेशप्रक्रियेत प्रत्येक वर्षी बदल करत ती विद्यार्थ्यांचा वेळ, पैसा, श्रम वाचवणारी तसेच पारदर्शक करण्यात येत आहे. विद्यार्थी पालकांना प्रवेश प्रक्रियेबद्दल नेहमीच अनेक शंका असतात. कारण प्रक्रिया तीच असते फक्त पालक व विद्यार्थी प्रत्येक वर्षी बदलत असतात.

- प्रा. रमेश देशपांडे, प्रवेश प्रक्रिया मार्गदर्शक

 ११ वी (FYJC) अॅडमीशन साठी मुंबई (MMRDA), पुणे (पिंपरी चिंचवडसह), नाशिक, औरंगाबाद, नागपूर व अमरावती विभागांतर्गत येणाऱ्या सर्व कॉलेजेस व कट-ऑफची माहिती fyjc.vidyarthimitra.org या पोर्टलवर उपलब्ध आहे.

त्याचबरोबर इंजिनीरिंग व फार्मसीला अॅडमिशन घेणाऱ्या विद्यार्थ्यांसाठी संपूर्ण महाराष्ट्रातील कॉलेजेस यादी एका क्लिकवर गुणवत्ता यादी क्रमांक, कास्ट कॅटेगरी, कोणत्या शहरात, कोणत्या युनिवर्सिटी अॅडमिशन पाहिजे, त्याचबरोबर प्राधान्य क्रम किंवा पसंतीक्रम अशा अनेक ३०० पेक्षा ही जास्त ऑपशनची यादी बाबींना पडताळून शास्त्रशुद्ध पद्धतीने http://vidyarthimitra.org/rank_predictor या पोर्टलवर  उपलब्ध आहे.

Image result for click here gif http://fyjc.vidyarthimitra.org/

| Govt. & Private Jobs, Internships, Campus Drive, Off-campus & many more |

--------------------------------------------------------------------------------------------------------------------------------------------------------
 Get free Educational & jobs alert on WhatsApp OR Telegram(https://t.me/VidyarthiMitra) Save this mobile number (77200 25900) on your phone as VidyarthiMitra.org and send WHATSAPP message (Your Name, City & Interest)

--------------------------------------------------------------------------------------------------------------------------------------------------------
'विद्यार्थी मित्र' जॉईन करा आणि मिळवा न्यूज, नोकरी, शासकीय व निमशासकीय नोकऱ्यांच्या जाहिराती व माहिती अगदी विनामूल्य ते ही आपल्या व्हॉटस्अॅपवर किंवा* *टेलेग्राम (https://t.me/VidyarthiMitra) हा मोबाईल नं. सेव्ह करून आपले <नाव> <शहराचे नाव> <नोकरी> ७७२०० २५९०० मेसेज पाठवा

--------------------------------------------------------------------------------------------------------------------------------------------------------